Өлкөдө аскер кафедраларын жоюуга эмне себеп болгону түшүндүрүлдү

Аскердик кафедраларга студенттерди тандоо жана аларды окутуу коррупциялык көрүнүштү алып келет. Бул тууралуу бүгүн, 10-августта маалымат жыйынында Мобилизациялоо башкармалыгынын башчысы Сыргак Болобаев билдирди.

Анын айтымында, аскердик кафедраларды жоюу окутуу менен байланышкан коррупциялык көрүнүштү жоюу менен бирге аскерге чакырылган жогорку билимдүү жарандардын санынын көбөйүшүнө алып келет. "Жогорку билимдүү жарандардын тиешелүү адистиги, жашоо тажрыйбасы бар болгондуктан, армиянын күжүрмөн даярдыгы дагы көтөрүлөт", - деди Болобаев.

Мындан тышкары ал жыл сайын канча офицер чыгарылып жатканын баса белгиледи.

"Кыргыз Республикасынын Аскердик институту жана башка чет өлкөлүк аскердик окуу жайлардан 130-150 офицер чыгарылат. Өлкөбүздүн Куралдуу күчтөрүнүн катарынан ар кандай себептер менен орточо 100-120 офицер бошотулат. Көрсөтүлгөн сандар бир жылда запастагы офицерлердин санын толуктоого жетиштүү", - деп маалымдады Болобаев.