Ошто 3 адамдын өлүмүнө шектелген жаран 20 жылдан кийин соттолду

Ошто 3 адамдын өлүмүнө шектелген жаран 20 жылдан кийин соттолду. Бул тууралуу бүгүн, 12-августта Ош облустук сотунан билдиришти.

Окуя 1996-жылдын 5-июлунда Ош шаарында болгон. Анда 1969-жылы туулган Р.З.Саттикулов шериктери Х.Токбаев жана М.Токбаева менен кылмыш жасоо жөнүндө алдын ала макулдашып, Ош шаарынын С.А. аттуу тургунунун үйүндө 1934-жылы туулган Д.В.П., 1964-жылы туулган К.Ю., 1965-жылы туулган Л.И.Пны балта менен чапкылап өлтүрүшүп, жансыз денелерин сууга таштап жиберишкен. Мындай ишке алардын 26 миң сомун алуу үчүн барышкан.

Бул боюнча Х.Токбаев жана М.Токбаева кылмыш жоопкерчилигине тартылып, Р.З.Саттикуловдун кайда экени белгисиз болгондуктан айыбы сыртынан угузулган.

2015-жылдын 4-ноябрында издөөдө жүргөн Р.З.Саттикулов кармалып, кылмыш иши жандандырылган. Ал эми 2016-жылдын 17-июлунда Ош шаардык соту аны өмүр бою эркинен ажыратып, үй-мүлкү конфискацияланган.

Жогоруда аталган ишти Ош облустук сотунун Жазык жана административдик укук бузуулар жөнүндөгү иштери боюнча соттук коллегиясы 9-августта карап, Ош шаардык сотунун 17-июлдагы өкүмү өзгөртүлгөн. Облустук соттун чечимине ылайык, Р.З.Саттикуловдун жазасы 20 жылга төмөндөтүлүп, өкүмдүн калган бөлүгү өзгөртүүсүз калтырылган.