Москвада кыргыз жаранын өлтүрүүгө шектелген адам кармалды

"Москванын Рязанский кең көчөсүндө 12-августка караган түнү 2 адамды өлтүргөн жана 1 адамды жарадар кылган" деп шектелген жаран кармалды. Бул тууралуу орусиялык басылмалар жазып чыгышты.

"Кылмышка шектүү катары Иван Скоркин аттуу жаран кармалды. Учурда ал убактылуу кармоочу жайга камакка алынды", - деп айтылат маалыматта.

Белгилүү болгондой, кылмышка шектүү 2005-жылы жана 2008-жылы "каракчылык" беренеси боюнча жоопко тартылган.

Эске салсак, окуя катталган түнү белгисиз адамдардан турган топ дүкөндүн сатуучусун жана кардарын өлтүрүп кеткен. Алардан тышкары кол салуу учурунда каршылык көрсөткөн бир адам жаракат алган. 3 адам сыра саткан дүкөнгө кирип, дүкөн ээси 69 жаштагы Лев Камалян менен урушуп кетишкен. Аны ошол жерден бычак менен жүрөк тушка сайып, ал каза болуп калган. Ал эми 36 жаштагы Атабек Мундузов аттуу кыргыз жараны алардын чабуулуна кабылып, бычактан алган жараатынан каза тапкан.