Быйылкы ажылыкка алгачкылардан болуп Ош шаарынан 342 жаран жөнөйт

Бүгүн, 15-августта Ош шаарындагы "Сулайман-Тоо" мечитинде жарандарды ажылык сапарга узатуу иш-чарасы болуп өттү. Ага Ош шаарынын мэри Айтмамат Кадырбаев, Ош шаардык кеңешинин төрагасы Жапарбек Ормонов, Ош шаарынын казысы Убайдулла ажы Сарыбаев жана шаар тургундары катышты.

Айтмамат Кадырбаев зыяратчыларга ажылык сапарга барып, кыргыз жерине, анын ичинде Ош шаарынын тынччылыгы үчүн дуба кылуусун суранды.

“Баарыңыздарды карап туруп жүзүңүздөрдөн тазалыктын, боорукердиктин нуру чачып жатканын көрүп турам. Ажылык сапар дал ушунусу менен айырмаланат. Мусулманчылыктын бир парзын аткарып ажылык сапарга аттанып жатасыздар, ийгилик менен барып келиңиздер. Сүйүктүү пайгамбарыбыз туулуп-өскөн жана ислам дини алгачкы жаралып ааламга жайыла баштаган ыйык жерлерди көрүү адамдардын жан дүйнөсүнө кубат берип, диний ишенимдерин күчөтөт”, - деди Кадырбаев.

Ош шаарынын казыятынын маалыматы боюнча, 19-август күнү Кыргыз жеринен алгачкылардан болуп Ош шаарынан 342 жаран ажылык сапарга учуп кетет. Жалпысынан Меккеге зыярат кылууну көздөгөн 604 шаар тургуну шаардык казыятка кайрылып, чүчү кулактын негизинде 342 жаран тандалып алынган.

Белгилей кетсек, ажылык сапар менен Меккеге аттануу 19-августтан 19-сентябрга чейин жүргүзүлөт.