Евробиримдик "2015-жылы шайлоо таза жана ачык өттү" деп таап, Кыргыз Республикасына 5 миллион евро берди

Кыргыз Республикасынын шайлоо системин реформалоо үчүн Евробиримдик 5 миллион евро көлөмүндө грант бөлдү. Бул тууралуу бүгүн, 18-августта биримдиктин Кыргыз Республикасындагы өкүлчүлүгүнүн басма сөз кызматы жарыялады.

Маалым болгондой, КРнын шайлоо системин реформалоо программасынын жалпы бюджети 11 миллион еврого барабар. Аны ишке ашыруу боюнча келишим 2016-жылдын 19-апрелинде бекитилген.

"Өлкөнүн бийлиги Евробиримдик менен макулдашкан максаттарды жана милдеттерди аткарса, каражаттар бөлүнүп берилмекчи. 2015-жылдагы парламенттик шайлоого шайлоочулардын 51 пайызынан көбү катышып, "шайлоо ачык жана таза өттү" деп табылгандыгынан максаттар орундалды. Бул жыйынтыктардын негизинде Кыргыз мамлекети 5 миллион евро көлөмүндө биринчи бөлүктү алды", - деп айтылат маалыматта.

Ал эми калган акча каражаттары 2017-2018-жылдарды берилери күтүлүүдө.