Москвадагы өрт. Юрий Лугвин: “Мени басмаканага элдик баатыр болуу үчүн чуркап барды деп жазгандар да болду”

Москвадагы 14 кыз-келиндин өмүрүн алган өрт кырсыгында жабыркагандарды жөнөкөй жарандар сактоого аракет кылып, беш адамды куткаргандыгы тууралуу маалым болгон. Кыргыз жигиттери кыз-келиндерди сактоо үчүн бардык аракеттерин жумшашкан. Аларга орус улутундагы жөнөкөй жарандар адамдык бийик сапатын көргөзүп, куткарууга жардамдашышкан. Мына ошолордун бири 24 жаштагы Юрий Лугвин "Комсомольская правда" басылмасына маек берген. Анын Москвада жашаганына үч жыл болгон, өзү Курск облусунун Курчатов шаарынан болот. Ал өрт болуп жатканда бир кыздын жанын сактап калууга жардамдашкан.

“Бир канча киши болуп өрт өчүрүүчүлөрдүн шатысын алып 3-кабатка чейин чыктык. Кулап бараткан кызды бир бала шымынан кармап тартып жаткан. Бирок кыз түшүп кетип, башы менен чатырга тийип, эсин жоготту. Биз аны көтөрүп барып өрт өчүрүүчүлөргө бердик”, - деген Юрий Лугвин.

“Мени басмаканага элдик баатыр болуу үчүн чуркап барды деп жазгандар да болду. Көптөгөн ыплас сөздөрдү да жазышты. Бир күндө Орусия жана Кыргыз Республикасынын эли үчүн элдик баатыр болуп калуу максатым болгон эмес", - деп кошумчалады.

Бирге жанын аябастан куткарууга катышкан балдар жөнүндө мындай дейт: “Алар мага өз адамдардай эле сезилди. Тилекке каршы, алар менен таанышууга убакыт болгон жок. Мен бир сааттан кийин ал жактан кеттим, аларды көргөн жокмун. Кийин 17 киши каза болгонун уктум”. Ошондой эле азыркы учурда каржы жагынан кыйналып жатканын, бир аз бутка турганда өлкөбүзгө келүү ниети бар экенин айткан.

"Куткаруу учурунда коркуу сезими болдубу?" деген суроого: “Чынын айтсам, корктум, ким эле коркпосун? Эч кандай коргонуу каражаты жок, футболка менен оозумду жана мурдумду жаап алып жүрдүм. Баары түтүн. Арыраак барганда бир эшикке кирдим, кеңсе окшойт... Андан соң темир эшиктин алдына барып токтоп калдым. Бутум менен тепсем дагы ачылган жок. Ары жактан бирөө эшикти ачууга аракет кылганын туйдум. Бирок түшүнгөн жокмун, ал басмакананын кызматкери же ары жагынан кирген куткаруучулар экенин”, - деп жооп берген.

"Мен өзүмө карата "баатыр" деген сөздү колдонбойт элем. Эгер мен басмаканадагы өрттөн каза болгондордун жок дегенде жарымын куткарып калсам, ошондо өзүмдү баатыр сезмекмин", - деп жыйынтыктаган өз сөзүн.