Москвадагы өрттөн Кыргыз өлкөсүнүн жарандарын куткарган Юрий Лугвин Жогорку Кеңештин Ардак грамотасы менен сыйланды

27-августта Москвадагы басмаканада болгон өрттөн Кыргыз өлкөсүнүн жарандарын куткарган Орусиянын жараны Юрий Лугвин Жогорку Кеңештин Ардак грамотасы менен сыйланды. Бул тууралуу парламенттин басма сөз кызматы жарыялады.

Маалым болгондой, Жогорку Кеңештин төрагасы Чыныбай Турсунбеков Юрий Лугвинге чукул кырдаалдарда көрсөткөн тайманбас эрдиги үчүн ыраазычылык билдирди.

Өз кезегинде Юрий Лугвин Кыргыз Республикасынын жарандарынын жылуу кабыл алганына ыраазычылыгын айтып, мындай көңүл буруу ага жакшы маанай тартуулаганын белгилеп өттү. “Мен кереметтүү Ысык-Көлдү көрүп, меймандос элиңиздер менен тааныштым. Улуттук тамактарыңыздар да өзгөчө экен. Кыскасы, менде Кыргыз мамлекети тууралуу жакшы гана ой калыптанды десем болот. Албетте, бул өлкөнүн башкы байлыгы - калкы деп айтар элем”, - деди Лугвин.

"Москвадагы басмаканада болгон өрттөн кыргыз кыз-келиндерин куткаруу ишине Кыргыз Республикасынын жарандары да катышкан. Алардын да аты-жөнү такталгандан кийин баары сыйлыкка көрсөтүлөт", - деп айтылат маалыматта.