Москвадагы өрттөн кыргыз кыздарын куткарууга аракеттенген 5 мекендешибиз дагы сыйланат (тизме)

27-августта Москвадагы Алтуфьев шоссесиндеги басмаканадагы өрттөн кыргыз кыздарын куткарууга куткаруучулардан сырткары жөнөкөй адамдар да аракет кылышкан. Президент Алмазбек Атамбаев куткарууга жардам көрсөткөн адамдарды сыйлоо тууралуу маселени карап чыгууну өкмөткө тапшырган. Алардын бири орус улутундагы Юрий Лугвин II Дүйнөлүк көчмөндөр оюндарына чакырылып, учурда өлкөбүздө жүргөнү маалым. Ал бүгүн, 6-сентябрда Жогорку Кеңештин Ардак грамотасы менен сыйланды. Ал эми Кыргыз өлкөсүнүн 5 жаранынын аты-жөнүн тактоо боюнча тиешелүү кызматтарга тапшырма берилди. Өздүктөрү такталган соң алар да сыйлыкка көрсөтүлүшөт.

SUPER.KG порталы баатырдыгын көрсөткөн беш жарандын аты-жөнүн болжолдуу тактады. Москвадагы "Кыргыз биримдиги" коомунун төрагасынын орун басары Улан Кошматов SUPER.KG порталына билдиргендей, алар: Азамат Акматов, Аширбек Шакиров, Азизбек Абдыгапар уулу, Маматсабыр Алимбек уулу, Таалайбек Марип уулу.

Эскерте кетсек, Таалайбек Марип уулу ал каргашалуу окуя тууралуу SUPER.KG порталына айтып берген.

Булардан сырткары Нурмухамед Кадыржанов аттуу жаран дагы куткарууга жардамдашып жүрүп иске ууланып, ооруканага жатып калган.