Москвада Кыргыз өлкөсүнүн 14 жаранынын өмүрүн алган өрт боюнча айыпталган басмакана жетекчиси 2 айга камакка алынды

Москвада Кыргыз өлкөсүнүн 14 жаранынын өмүрүн алган өрт боюнча айыпталган басмакана жетекчиси 2 айга камакка алынды. Бул тууралуу бүгүн, 7-сентябрда орусиялык басылмалар жазып чыгышты.

Маалыматка караганда, тиешелүү чечимди Москва шаарынын Останкинский райондук соту чыгарган. Ага ылайык, "Печатный экспресс” ишканасынын башкы директору Сергей Москвин 2 ай камакта болот. Бул убакыт аралыгында тергөө иштери жүрөт.

Айта кетсек, 27-август күнү Алтуфьев шоссесинде жайгашкан басмаканада өрт чыгып, анын кесепетинен 17 адам каза тапкан. Алардын 14ү Кыргыз өлкөсүнүн жарандары болушкан. Мындан улам “Печатный экспресс” ишканасынын башкы директору Сергей Москвин жана ишкананын башкы инженери Антон Яцковго “өрт коопсуздук эрежелерин бузуу” беренеси боюнча кылмыш иши козголгон. Азырынча Антон Яцковдун кайда экени белгисиз. Ал эми Сергей Москвин күнөөсүн мойнуна алып, укук коргоо органдарына өзү келген.