Электр энергиясын нормативден аша чаап колдонгон аймактарга "акылдуу" эсептегичтер орнотулууда

"Түндүк электр" ачык акционердик коому “акылдуу” эсептегичтерди орнотуу иштерин баштады. Бул тууралуу бүгүн, 8-сентябрда Улуттук энергетикалык холдинг компаниясынын басма сөз кызматынан билдиришти.

Маалыматка ылайык, аталган эсептегичтер энергияны көп колдонгон ири керектөөчүлөргө жана жоготуулар нормативден аша чабылган көйгөйлүү аймактарга орнотулууда. 2016-жылдын 8-сентябрына карата Чүй, Талас облустарынын "Райондук электр тармактар" ишканасы 7847 "акылдуу" эсептегичти орноткон.

"Түндүк электр" ишканасы Чүй облусуна 49 425, Талас облусуна 5 миң даана эсептегич орнотту. Мындай эсептегичти орнотуу аркылуу үзгүлтүксүз электр энергиясы менен камсыздоого, берилген электр энергиянын сапатын жогорулатууга, электр жабдуунун ашыкча жүктөмүн жокко чыгарууга жардам берет", - деп билдирди Улуттук энергетикалык холдинг компаниясынын басма сөз кызматы.

Маалыматка ылайык, "Түндүк электр" ишканасы керектөөчүлөрүнө инвестициянын эсебинен 20 миң, Чүй, Талас облустарына өз эсебинен 34 425 эсептегич орнотот.