“Үңкүр-Тоодо эч кандай паспорттук режим жок, ал жер кыргыздардыкы” дейт өзбек милиция кызматкерлери кармап кеткен Нурбек Усупбаев

Мамлекеттик чек ара кызматы Кыргыз өлкөсүнүн 4 жараны өткөрүлүп берилгенин тастыктады. Чек ара кызматынын маалыматында “8-сентябрь күнү Ала-Бука районунун Баймак тилкесинде эки тараптуу жолугушуу болуп, жыйынтыгында өзбек милиция кызматкерлери тарабынан кармалган 4 кыргыз жараны өткөрүлүп берилген. Сүйлөшүүгө Чек ара кызматынын жана укук коргоо органдарынын өкүлдөрү катышты” деп айтылат.

22-август күнү Үңкүр-Тоодон өзбек милиция кызматкерлери тарабынан кармалып кеткен Нурбек Усупбаев менен телефон аркылуу байланышканыбызда ал үйүндө экенин айтты.

“Үңкүр-Тоодо эч кандай паспорттук режим жок. Ал жер кыргыздардыкы”, - деди Усупбаев.

Айта кетсек, 22-август күнү Үңкүр-Тоодогу станциянын 4 кызматкерин Өзбекстандын милициясы кармап кеткен. Ал эми өзбекстандык маалымат булактары өлкөнүн Ички иштер министрлигине таянып, “22-август күнү Үңкүр-Тоодо паспорттук режимди текшерүү жүрүп, Өзбекстандын аймагында мыйзамсыз жүргөн 4 жаран кармалды” деген маалымат тараткан эле.