КСДП менен "Өнүгүү-Прогресс" парламенттик комитеттин төрагасынын орунун талашып жатышат

Жогорку Кеңештин КСДП жана "Өнүгүү-Прогресс" фракциялары парламенттин Конституциялык мыйзамдар, мамлекеттик түзүлүш, сот-укуктук маселелер жана парламент регламенти боюнча комитетинин төрагасы кызматына талапкерлерди коюшту. "Өнүгүү-Прогресстин" атынан депутат Тынчтык Шайназаров сунушталса, КСДПнын атынан депутат Асел Кодуранова көрсөтүлүүдө.

Айрым депутаттар Шайназаров аталган комитеттин мүчөсү болбогондуктан, комитеттин төрагалыгына анын талапкерлигин көрсөтүүгө мүмкүн эмес дешүүдө. "Өнүгүү-Прогресс" фракциясынын лидери Бакыт Төрөбаев регламентте мындай талап жок экенин айтты.

Бул маселе боюнча талкуу жүргүзүлүп, комитет мүчөлөрү Асел Кодуранованы Конституциялык мыйзамдар, мамлекеттик түзүлүш, сот-укуктук маселелер жана парламент регламенти боюнча комитетинин төрайымы кызматына шайлоо маселесин жалпы палатада кароону чечишти. Эгер Тынчтык Шайназаров комитеттин курамына киргизилсе, анын да талапкерлиги комитеттин төрагалыгына карала турган болду.