Азимжан Аскаровдун соту 11-октябрда уланат

Азимжан Аскаровдун соту 11-октябрда уланат. Бул тууралуу бүгүн, 5-октябрда Чүй облустук сотунан билдиришти.

Маалыматка караганда, тиешелүү чечимди 4-октябрда өткөн сот отурумунда Чүй облустук сотунун соттук коллегиясы чыгарган. Эми ар шейшемби сайын Бишкектеги Жаза аткаруу кызматынын Күзөт жана кайтаруу департаментинде Азимжан Аскаровдун иши каралат.

Эскерте кетсек, Азимжан Аскаровду 2011-жылы Кыргыз Республикасынын Жогорку Соту күнөөлүү деп таап, өмүр бою эркинен ажыраткан. Бул чечимге макул болбогон Азимжан Аскаров БУУнун Адам укуктары боюнча комитетине кайрылган. Ал комитеттин үстүбүздөгү жылдын 20-апрелинде чыгарган чечимине ылайык, Аскаровду абактан бошотуп, соттун өкүмүн жокко чыгаруу каралган. Мындан улам жаңы ачылган жагдайларга байланыштуу иш Жогорку Сотто кайрадан каралып, Жалал-Абад облустук сотунун 2010-жылдын 10-ноябрындагы өкүмү жана Жогорку Соттун 2011-жылдын 20-декабрындагы токтому жокко чыгарылган. Ошондой эле жазык ишти апелляциялык тартипте кароо үчүн Чүй облустук сотуна жиберүү чечими кабыл алынган.