Азимжан Аскаровду камакта кармоо шартын өзгөртүү өтүнүчү ачык калтырылды

Бүгүн, 11-октябрда Азимжан Аскаровдун ишин кароо уланууда. Чүй облустук сотунда иши каралып жаткан Аскаров сотко өтүнүч келтирип, Төлөйкан Исмаилованы коомдук жактоочу катары отурумга катышуусун суранды. Соттук коллегия ордунан кеңешип, өтүнүчтү канааттандырды. Ошондой эле жактоочу Валериян Вахитов Аскаровду камакта кармоо шартын өзгөртүү өтүнүчүн келтирди. Соттук коллегия өтүнүчтү ачык калтырып, бүгүн чечилерин кошумчалады. Ал эми Төлөйкан Исмаилова айыпталуучунун ден соолугу начарлап жаткандыктан үй камагына чыгаруу керек экенин айтты.

Эскерте кетсек, Азимжан Аскаровду 2011-жылы Кыргыз Республикасынын Жогорку Соту күнөөлүү деп таап, өмүр бою эркинен ажыраткан. Бул чечимге макул болбогон Азимжан Аскаров БУУнун Адам укуктары боюнча комитетине кайрылган. Ал комитеттин үстүбүздөгү жылдын 20-апрелинде чыгарган чечимине ылайык, Аскаровду абактан бошотуп, соттун өкүмүн жокко чыгаруу каралган. Мындан улам жаңы ачылган жагдайларга байланыштуу иш Жогорку Сотто кайрадан каралып, Жалал-Абад облустук сотунун 2010-жылдын 10-ноябрындагы өкүмү жана Жогорку Соттун 2011-жылдын 20-декабрындагы токтому жокко чыгарылган. Ошондой эле жазык ишти апелляциялык тартипте кароо үчүн Чүй облустук сотуна жиберүү чечими кабыл алынган.