Түндүк Америка менен Евразия жылдар өткөн сайын бири-биринен алыстап жатат

Орусиянын Илимдер академиясынын окумуштуулары Түндүк Америка менен Евразия жылдар өткөн сайын бири-биринен алыстап жатканын айтышканын "PlanetToday" басылмасы 17-октябрда жарыялады.

Мындай жыйынтыкты окумуштуулар бир нече астрономиялык мекемелерден алынган сүрөттөрдү изилдеген соң чыгарышкан. Алар сүрөттөрдү салыштырып, тектоникалык плиталардын жылганы Түндүк Америка менен Евразиянын аралыгын жыл сайын 2-3 сантиметрге алыстатып жатканын билишкен. Мындан сырткары изилдөөчүлөр Африка менен Евразия жыл сайын болжол менен 2 сантиметрге жакындашып жатканын байкашкан.

"Бирок кабатыр болуунун кереги жок. Окумуштуулар тектоникалык плиталардын мындай жылышы Жер катмары үчүн кадимки көрүнүш экенин жана мындай өзгөрүүлөр эч кандай жаратылыш кырсыктарына алып келбесин айтышат", - деп жазылган маалыматта.

Буга чейин астрономдор Жер жалгыз сейсмикалык активдүү планета эмес экенин айтышкан. Алардын ою боюнча, Меркурийде да тектоникалык плиталар жылат.