“Манас” аэропортунун кызматкери “жүргүнчүнүн 2,5 миллион сомдук зер буюмдарын уурдаган” деген шек менен кармалды

“Манас” аэропортунун кызматкери “жүргүнчүнүн 2,5 миллион сомдук зер буюмдарын уурдаган” деген шек менен кармалды. Бул тууралуу бүгүн, 20-октябрда Ички иштер министрлигинен билдиришти.

Маалыматка караганда, милиция кызматкерлерине Бишкек шаарынын тургуну кайрылып, белгисиз адам Оштон Бишкекке учуп келген жакын тууганынын зер буюмдарын уурдап алганын айткан. Бул боюнча ыкчам иликтөө иштери жүрүп, кылмышка шектүү катары “Манас” аэропортунун рейсти көзөмөлдөөчү 26 жаштагы кызматкери кармалган.

“Кылмышка шектелип кармалган жарандан далил зат катары уурдалган зер буюмдар алынды. Ал зер буюмдарды Сокулук районундагы айылдардын биринин аймагына көмүп, бир канчасын сатып жиберүүгө үлгүргөн. Учурда кылмыш иши козголуп, келтирилген чыгым 2,5 миллион сомду түзгөнү аныкталды”, - деп айтылат ИИМдин маалыматында.