Кара-Суу районундагы тазалык кызматкери менен Салык кызматынын өкүлүнүн ортосунда болгон мушташ боюнча иликтөө токтотулду

Кара-Суу районундагы тазалык кызматкери менен Салык кызматынын өкүлүнүн ортосунда болгон мушташ боюнча иликтөө токтотулду. Бул тууралуу бүгүн, 20-октябрда Ош облустук ички иштер башкармалыгынан билдиришти.

Аталган башкармалыктын басма сөз катчысы Жеңиш Ашырбаев: “Алардын канчалык жабыркаганын текшерүү үчүн соттук-медициналык текшерүүдөн өтүшү керек болчу, бирок баш тартышкан. Кечээ “бири-бирибизге эч кандай дообуз жок” деп тосмо арыз жазышты. Мындан улам кылмыш иши козголгон жок, иликтөө иштери токтотулду”, - деп билдирди.

Ал эми буга чейин Мамлекеттик салык кызматы кызматтык иликтөөнүн жыйынтыгында Кара-Суу районундагы кызматкери иштен алынганын билдирген эле.

Айта кетсек, окуя 5-октябрга караган түнү болгон. Анда базардын аймагын тазалап жаткан Эркин Алмакеев менен Салык кызматында иштеген Ариет аттуу адам мушташа кетишкен. Жыйынтыгында экөө тең денесинен жараат алып, милицияга арыз жазышкан.