Кочкор районунда 2 кызын өлтүрүүгө шектелип кармалган аял психикалык жактан жабыркап, каттоодо турган

Кочкор районунда 2 кызын өлтүрүүгө шектелип кармалган аял психикалык жактан жабыркап, каттоодо турган. Бул тууралуу бүгүн, 21-октябрда SUPER.KG порталына Ички иштер министрлигинен билдиришти.

Маалыматка ылайык, кылмышка шектүү катары кармалган 1986-жылы туулган К.А. психикалык жактан жабыркап, ооруканада каттоодо турган.

"16-октябрь күнү саат 12:00 чамасында милицияга медициналык кызматкерлерден Кочкор районуна караштуу Чекилдек айылындагы үйлөрдүн биринен 2013-жылы туулган Эльвира жана 2014-жылы туулган Раяна аттуу кыздардын жансыз денелери табылгандыгы тууралуу маалымат түшкөн. Окуя болгон жерге барган кызматкерлерге кыздардын энеси 15-октябрь күнү кечинде кыздарын жуунтуп, сасык тумоого каршы дары бергенин жана эртең менен кыздары ойгонбой калганын билдирген. Иликтөө иштеринин алкагында кылмышка шектүү кыздарына полиэтилен баштыгын кийгизип, тумчуктуруп өлтүргөнү аныкталган. Кийин окуяны жашыруу максатында кыздардын энеси эртең менен үйүнө тууганын чакырып, кыздар оорудан улам каза болгонун айткан. Бул факт боюнча "адам өлтүрүү" беренеси менен кылмыш иши козголуп, кылмышка шектүү 2 айга камакка алынды. Учурда тергөө амалдары жүрүп, тиешелүү экспертизалар дайындалды", - деп билдиришти ИИМден.

Эскерте кетсек, буга чейин жергиликтүү тургундардын бири окуя тууралуу айылда ар кандай версиялар айтылып жатканын билдирген эле.