Жеңишбек Айтиевдин уулунун өлүмүнө шектелген жаран: "Кошунамдын баласы тамагыма уу салганы келе жаткан экен, бычакты алып сайып жибердим"

Жеңишбек Айтиевдин уулун бычактаган жаран кармалды. Бул тууралуу бүгүн, 21-октябрда Ош шаардык ички иштер башкармалыгынан билдиришти.

Маалыматка караганда, окуя бүгүн саат 12:00 чамасында Ош шаарынын Гостелло көчөсүндөгү 1Б үйүнүн алдында болгон. Анда 2004-жылы туулган Туратбек Акпаралиевди (Жеңишбекович) 1994-жылы туулган А.Н. аттуу жаран бир нече жолу бычак менен сайып салган.

"Жабырлануучу окуя болгон жерден каза тапкан. Анын көкүрөгүндө жана моюнунда бир нече бычактын издери болгон. Кылмышка шектүү ошол эле жерден кармалып, кылган кылмышын моюнуна алды. Мындай кылганынын себебин "кошунамдын баласы тамагыма уу салганы келе жаткан экен, бычакты алып сайып жибердим" деп түшүндүргөн. Кылмышка шектүүнүн атасынын айтымында, ал мурда психикалык оору менен жабыркаган, бирок атайын ооруканага катталган эмес. Учурда кылмыш иши козголуп, тергөө амалдары жүрүп жатат", - деп билдирди Ош ШИИБинин басма сөз катчысы Замир Сыдыков.

Маркум Туратбек Акпаралиев куудул Жеңишбек Айтиевдин уулу. Буга чейин куудулдун туугандары бул маалыматты тастыкташкан эле.