Кочкор районунда 2 кызын өлтүрүүгө шектелип кармалган аял күйөөсү менен ажырашып кеткен

Кочкор районунда 2 кызын өлтүрүүгө шектелип кармалган аял күйөөсү менен ажырашып кеткен. Бул тууралуу бүгүн, 21-октябрда SUPER.KG порталына Ички иштер министрлигинин басма сөз катчысы Эрнис Осмонбаев билдирди.

"Кичинекей наристелерин өлтүрүүгө шектелип кармалган аял күйөөсү менен ажырашып кеткен экен. Каза болгон кыздарынан сырткары башталгыч класста окуган дагы бир кызы бар. Аларды жалгыз тарбиялап келген. Кыздарын өлтүргөн учурда үйүндө эч ким болгон эмес, ал эми улуусу мектепте болгон. Кылмышка шектүү кыздарын 15-октябрь күнү тумчуктуруп, эртеси күнү тууганына барып, кыздары оорудан улам каза болуп калганын билдирген", - деди Осмонбаев.

Эскерте кетсек, 16-октябрь күнү саат 12:00 чамасында милицияга медициналык кызматкерлерден Кочкор районуна караштуу Чекилдек айылындагы үйлөрдүн биринен 2013-жылы туулган Эльвира жана 2014-жылы туулган Раяна аттуу кыздардын жансыз денелери табылгандыгы тууралуу маалымат түшкөн. Иликтөө иштеринин алкагында 30 жаштагы К.А. аттуу кыздардын энеси аларды пакет менен тумчуктуруп өлтүргөнү аныкталган.