Орусияда тартип сакчысына пара берүүгө аракет кылган Кыргыз Республикасынын жаранына 90 миң рубль айып салынды

Орусиянын Красноярск шаарында Кыргыз мамлекетинин жараны полиция кызматкерине пара берүүгө аракет кылгандыгы үчүн соттолуп, ага 90 миң рубль айып пул салынды. Бул тууралуу бүгүн, 25-октябрда орусиялык маалымат каражаттары жазып чыгышты.

Маалыматка караганда, 2015-жылдын февраль айында тартип сакчылары полиция бөлүмүнө 21 жаштагы Кыргыз Республикасынын жаранын алып келишкен. Текшерүүдөн кийин ал Орусиядагы убактылуу мөөнөтү бүтсө да өлкө аймагынан чыгуудан качып, миграциялык мыйзамды бузгандыгы аныкталган.

"Аймактык тескөөчү протокол түзүп жаткан учурда кармалган адам административдик жоопкерчиликке тартылып калбоо үчүн анын столунун үстүнө 3 миң рубль койгон. Ошол жерден полиция кызматкерлери аны кармап, кылмыш иши козголуп, 2016-жылдын май айында Кыргыз өлкөсүнүн жаранын күнөөлүү деп табышкан. Жыйынтыгында сот ага 90 миң рубль айып пул салган. Соттолгон жарандын жактоочусу ага берилип жаткан жазанын адилетсиз экендигин айтып, ага салынган айып пулдун суммасын азайтууну суранган. Бирок сот анын сунушун негизсиз деп таап, өкүмүн өзгөрткөн эмес", - деп жазылат маалыматта.