Жантөрө Сатыбалдиев: "Макмал алтын" ишканасы өлкө үчүн маанилүү мекеме"

Бүгүн, 18-апрелде премьер-министр Жантөрө Сатыбалдиев Жалал-Абад облусунун Тогуз-Торо районундагы “Макмал алтын” ишканасы менен таанышып чыкты. Ал жерде иштеген жумушчулар менен болгон жолугушууда өкмөт башчы “2012-жылдын күз айларынан бери өкмөт “Макмал алтын” ишканасынын иштөөсүн мындан ары да улантуу тууралуу маселенин үстүнөн иштеп жатат. Бул жерде 1200 адам эмгектенет жана Тогуз-Торо районунда гана эмес, республика үчүн бул ишкана эң маанилүү мекеме. Комбинаттын ишин толук кандуу улантууга өкмөт ар тараптан колдоо көрсөтөт”,- деди. Маалыматка таянсак, аталган ишкана былтыр 367 килограмм алтын өндүргөн. “Биз компрессор жабдыгынын иштен чыгуусуна байланыштуу өткөн жылкы планды аткара албай калдык. Аны оңдоого 2 ай убакыт кетти”,- деди ишкананын директору Нурлан Исаков. Быйыл 500 килограмм алтын өндүрүү пландалып жатканын кошумчалады ишкана башчысы.