Тажик айдоочусу оор жүк ташуучу унаасы менен Өтмөк ашуусунан 10 күндөн бери чыга албай жатат

Тажик айдоочусу оор жүк ташуучу унаасы менен Бишкек-Ош жолунан түшүп, Өтмөк ашуусунан чыга албай тыгылып калган. Бул тууралуу Өзгөчө кырдаалдар министрлиги билдирди.

"Талас облусунун Талас районунун Өтмөк ашуусунда калган жүк ташуучу автоунаа Тажик Республикасынын жарандарына таандык. Ал Орусия Федерациясынан жүк ташып келе жаткан. ЖЭИ-36 ишканасы тарабынан 1 МАЗ автоунаасы, 1 автогрейдер, 1 кар тазалоочу унаа менен автофургонду чыгарууга аракет жасалды, бирок чыгарууга мүмкүнчүлүк болгон жок. №36-Жол тейлөө ишканасынын погрузчиги оңдоого коюлган. ӨКМнын Талас райондук бөлүм башчысы, майор Назгүл Сыдыкбекова 22-октябрь күнү жеринде барып, автофургондун жүгүн түшүрүп, андан кийин тартып чыгаруу сунушун айтса, айдоочулары каршы болуп туруп алышкан", - деп билдирди басма сөз кызматы.

Автофургонду чыгарууга ЖТИ-36 ишканасы тарабынан бүгүнкү күнгө чейин бир нече жолу аракет жасалганы белгилүү болду. Бүгүнкү күнү андагы жүктү түшүрүүгө айдоочулар жетекчиликке уруксат алуу үчүн телефон чалбай жатышканы кошумчаланды. Ашууда калган жүк ташуучу автоунаанын айдоочуларына ЖТИ-36 ишканасы тарабынан жылуу бөлмө, ысык тамак уюштурулуп берилери айтылган.

Ал эми "Сорбон Аз Транс" экспедитордук компаниясы өзүнүн тыгылган унаасын чыгаруу үчүн 500 доллар жөнөткөн.