Алай районунда адам өмүрүн алган жол кырсыгы боюнча кылмыш иши козголду

Гүлчө-Дароот-Коргон унаа жолунда адам өмүрүн алган жол кырсыгы боюнча кылмыш иши козголду. Бул тууралуу Ош облустук ички иштер башкармалыгынан билдиришти.

Маалыматка караганда, жол кырсыгы 2016-жылдын 21-сентябрь күнү саат 20:30 чамасында аталган жолдун 187-чакырымында болгон. Анда 1987-жылы туулган Б.Замирбек Мерседес-Бенц үлгүсүндөгү унаасы менен жол кырсыгына кабылган. Анын кесепетинен унаанын ичиндеги жүргүнчү 1987-жылы туулган Майрамбек Нажинов каза болгон.

“Тиешелүү соттук-медициналык жана автотехникалык экспертиза жүргөн. Анын жыйынтыгында “жол коопсуздук эрежесин сактабастан, адам өлүмүнө жол берүү” беренеси боюнча кылмыш иши козголду. Мындан улам 27-октябрда айдоочу кармалып, убактылуу кармоочу жайга киргизилди”, - деди Ош ОИИБинин басма сөз катчысы Жеңиш Ашырбаев.

Айта кетсек, буга чейин маркумдун жакындары жол кырсыгы атайылап жасалганын айтып чыгышкан эле.