"Манас" аэропортундагы жардыргыч зат тууралуу жалган маалымат берген жарандын баш коргоо чарасы бүгүн каралат

"Манас" аэропортунда жардыргыч зат тууралуу жалган маалымат берген жарандын баш коргоо чарасы бүгүн каралат. Бул тууралуу бүгүн, 2-ноябрда SUPER.KG порталына УКМКдан билдиришти.

Буга чейин ал УКМКнын СИЗОсуна камакка алынган болчу. Аялынын учуп кетүүсүнө тоскоол болуу үчүн жардыргыч зат тууралуу жалган маалымат берген 1986-жылы туулган Е.Илья аттуу жаранга "терроризм актысы жөнүндө атайылап жалган билдирүү жасоо" беренеси менен кылмыш иши козголгон.

Кылмыш-жаза кодексине ылайык, жардыруулар, адам өлүмүнө алып келүүчү башка иш-аракеттер тууралуу жалган маалымат тараткандарга 50 миң сомдон 100 миң сомго чейин айып салынат же 1 жылдан 3 жылга чейин эркинен ажыратуу жазасы каралган.

Айта кетсек, Ички иштер министрлигинин нөөмөт бөлүмүнө 31-октябрь күнү саат 16:15 чамасында белгисиз адамдан маалымат келип түшкөн. Анда “Манас” аэропортундагы учакка жардыргыч зат коюлганы айтылган. Окуя болгон жерге ИИМдин жана УКМКнын кызматкерлери барышкан. Аэропорттун ичиндеги адамдар сыртка чыгарылган.