Түрк бийлиги билим берүү тармагында иштеген 103 кызматкерди камакка алды

Анкаранын Башкы прокуратурасы "оппозициячыл диний аалым Фетхуллах Гүлен менен байланышы бар" деп билим берүү системинде иштеген 103 кызматкерди камакка алды. Бул тууралуу чет элдик маалымат каражаттары жазып чыгышты.

Маалыматка караганда, текшерүү өлкөнүн 16 провинциясында жүрүп, буга чейин 31 адам кармалган.

Айта кетсек, 2016-жылдын 16-июлга караган түнү козголоңчулар аскердик төңкөрүш жасоого аракет кылышкан. Кагылышуу Анкара менен Стамбул шаарларында болгон. Маалыматтарга таянсак, анда 240 жаран каза болуп, 2 миңге жакын адам жарадар болгон. Түрк бийлиги төңкөрүш жасоо аракетин дин аалымы Фетхуллах Гүленге жүктөп келет. Ал төңкөрүшкө тиешеси жок экенин айткан. Төңкөрүш жасоо аракетинен кийин Түркияда "Гүлендин уюмуна байланышы бар" деп 32 миңге жакын адам камакка алынса, 70 миңге жакын адам жумуштан бошотулду.