Азимжан Аскаровдун сотунда кошумча күбөлөр суракка алынышты

Бүгүн, 8-ноябрда Чүй облустук соту Азимжан Аскаровдун ишин кароону улантты. Анда кошумча күбө катары Абдурашид Иманалиев, Уланжан Осмонов, Паридахон Акбарова суралып, 2010-жылдын 10-июнунда Азимжан Аскаровду үйүнүн жанынан көргөнүн айтышты. Ошондой эле сотто айыпталуучунун иниси Акимжан Аскаровдун аялы Турдукан Аскарова да суракка алынды. Суракта ал 2010-жылдын 15-июнунда 7-8 бет капчан адамдар үйүн тинтүүгө алышканын, Аскаровдун эч кандай күнөөсү жок экенин билдирди.

Эскерте кетсек, Азимжан Аскаровду 2011-жылы Кыргыз Республикасынын Жогорку Соту күнөөлүү деп таап, өмүр бою эркинен ажыраткан. Бул чечимге макул болбогон Азимжан Аскаров БУУнун Адам укуктары боюнча комитетине кайрылган. Ал комитеттин үстүбүздөгү жылдын 20-апрелинде чыгарган чечимине ылайык, Аскаровду абактан бошотуп, соттун өкүмүн жокко чыгаруу каралган. Мындан улам жаңы ачылган жагдайларга байланыштуу иш Жогорку Сотто кайрадан каралып, Жалал-Абад облустук сотунун 2010-жылдын 10-ноябрындагы өкүмү жана Жогорку Соттун 2011-жылдын 20-декабрындагы токтому жокко чыгарылган. Ошондой эле жазык ишти апелляциялык тартипте кароо үчүн Чүй облустук сотуна жиберүү чечими кабыл алынган.