Өзгөн районунда кекиликке аңчылыкка чыгышкан 3 адамга айып салынды

Өзгөн районуна караштуу Салам-Алик айыл аймагында кекиликке мыйзамсыз аңчылык кылган 3 адам кармалды. Бул тууралуу бүгүн, 15-ноябрда Экологиялык жана техникалык коопсуздук боюнча мамлекеттик инспекциянын басма сөз кызматынан билдиришти.

"Мыйзамсыз аңчылык кылгандардын жанынан каттоодон өтпөгөн куралдар табылган. Аларга атайын айып кагазы толтурулуп, инспекторлор тарабынан доо коюлган. Коюлган доо өз убагында мамлекеттин пайдасына өндүрүлдү", - деп билдирди басма сөз кызматы.

Маалыматка ылайык, Экологиялык жана техникалык коопсуздук боюнча мамлекеттик инспекциянын экологиялык адистери Жаратылыш ресурстарын сарамжалдуу пайдалануу департаменти мергенчилик менен алектенгендерге көзөмөл жүргүзбөй жаткандан улам аңчылар көбөйүп баратканын айтып чыкты.

Эске салсак, инспекциянын мыйзамдарына ылайык, ар бир кармалган кекиликке 1000 сом доо коюлат. Белгилүү болгондой, бүгүнкү күндө өлкө боюнча 2015-жылдагы санак менен 210 миң кекилик катталган.