"Дүйнө сулуусу-2016" сынагына Кыргыз өлкөсүнөн катыша турган Перизат Расулбек кызы акыры АКШга виза алды

"Дүйнө сулуусу-2016" сынагына Кыргыз өлкөсүнөн катыша турган Перизат Расулбек кызы акыры Америка Кошмо Штаттарына виза алды. Бул тууралуу Моделдик долбоорлорду уюштурган компаниянын директору Таттыбүбү Самидин кызы SUPER.KG'ге бүгүн, 17-ноябрда билдирди.

"Перизат өткөн жумада АКШ консулдугунан виза алды. 23-ноябрда Вашингтонду көздөй сапар алат. Жолдун узактыгы 1 күн, ал эми сынак 26-ноябрда башталат. 2 күндүн ичинде даярданууга мүмкүнчүлүгү бар. Сынактын талаптары боюнча, жанында эч ким болбойт. Финалга чыкса, албетте, биз барып жардамдашууга аракет кылабыз", - деди Самидин кызы.

Ошондой эле "Дүйнө сулуусу-2016" сынагынын катышуучусу Перизат Расулбек кызына аталган компаниядан бөлөк бир да демөөрчү чыкпаганы белгилүү болду. Таттыбүбү Самидин кызы сынактын расмий сайтындагы ката оңдолгонун кошумчалады.

Эскерте кетсек, "Дүйнө сулуусу-2016" сынагынын сайтында Кыргыз өлкөсүнүн желегинин ордуна Казакстандыкы коюлуп, катышуучуга АКШнын Кыргыз Республикасындагы элчилиги виза берүүдөн баш тарткан.