Ош шаарында суу жылытуучу жаңы аппарат ойлоп тапкан окутуучу Илимдер академиясына нааразы

Ош технологиялык университетинин окутуучусу Баатыр Акматов суу жылытуучу жаңы аппарат ойлоп тапты. Бул тууралуу бүгүн, 18-ноябрда ойлоп табуучу өзү SUPER.KG порталына айтып берди.

"Аппаратты иштеп чыгууга бир канча убакыт жумшадым. Аны жасоодо майда электроддорду пайдаландым. Суу жылытуучу "Аристон" сыяктуу аппараттарга караганда мен жасаган аппарат электр энергиясын 2 эсе аз талап кылат. Маселен, "Аристон" 250 киловатт электр энергиясы менен суу жылытат. Эгерде энергиянын кубаттуулугу 150 киловаттка түшсө, сууну жылыта албай калат. Мен ойлоп тапкан аппарат 150 киловатт энергия менен да сууну жылытуу күчүнө ээ", - деп билдирди Акматов.

Маалыматка ылайык, окутуучунун жаңы аппараты электрофизикалык иондоштуруу ыкмасы менен жасалган. Ойлоп табуучу бул эмгеги менен Москва шаарында өткөн көргөзмөгө катышып келген.

"Суу жылытуучу аппарат ойлоп тапсам, Илимдер академиясы көңүл буруп койгон жок. Ошол эле учурда Ош облустук жергиликтүү бийлик өкүлдөрү да маани беришпеди. Мындай ойлоп табуу өлкө боюнча жок. Кызыкдар адам болсо, өлкө башындагы адамдар буга таасирленип, көңүл бурушу керек болчу. Жалпы элге жайылтуу аракетин көрсө жакшы болот эле", - дейт Акматов.

Баатыр Акматов аталган эмгегин "Кыргыз патент" ишканасы аркылуу менчиктештирип алган.