Тажикстанда кыргыз элинин Маданият күндөрү өттү

Тажикстанда 17-20-ноябрда Кыргыз Республикасынын Маданият күндөрү өттү. Бул тууралуу Маданият, маалымат жана туризм министрлигинин басма сөз кызматы кабарлады. Ачылуу аземине Тажикстандын маданият министри Шамсиддин Орумбекзод жана кыргыз тараптан министрдин орун басары Фархад Бекманбетов катышты.

"Кыргыз делегациясы Дүйшөмбү жана Вахдата шаарларынын тургундарын мыкты даярдалган маданий программа менен кубандырды. Музыка жана бий тармагындагы чыгармачыл топтор эң кооз, эстен кеткис номерлерин тартуулап, кыргыз элинин салтын, маданиятын көргөзө алышты", - деп жазылат маалыматта.

Ошондой эле кыргыз киносунун жумалыгында Кинематографисттер үйүндө "Курманжан датка", "Аку", "Сүтак" тасмалары көрсөтүлгөнү белгилүү болду. Ал эми концертте Бишкек шаарынын мэриясынын элдик аспаптар оркестри Токтогул Сатылгановдун, С.Жумалиевдин "Миң кыял", "Мекеним сенден башталат", Ж.Шералиевдин "Кыштак четинде" жана "Эргиме" чыгармаларын, Т.Казаковдун "Сүйүү жазы" жана Н.Тилендиевдин "Тажик бийи" чыгармаларын аткарышты.

Токтогул Сатылганов атындагы Кыргыз улуттук филармониясынын солисттери Замира Мавлянова, Чырмаш Төрөбеков жана Бишкек мэриясынын оркестринин солисти Бакыт Ыбыкеев "Кутмандуу жер", "Неаполитанская песня", "Алтынчы күнү кечинде", "Ой, тобо", "Сагындым" ырларын аткарышкан. Ал эми ырчы Нэна "Нарындан жазган салам кат" жана "Өмүр майрамы" ырларын тартуулаган.

Мындан сырткары көргөзмөлөр да уюштурулган.