ЖЫЛНААМА, 24-НОЯБРЬ: 128 жыл мурун америкалык психолог, педагог жана жазуучу Дейл Карнеги төрөлгөн

Мындан 128 жыл мурун америкалык педагог, психолог жана жазуучу Дейл Брекенриж Карнеги төрөлгөн. Жаштарды коммуникативдик жактан даярдоонун маанилүүлүгүн Америкада мамлекеттик деңгээлге алып чыккан Дейл Карнеги адамдардын карым-катнашы жана оратордук искусство боюнча институтту негиздеген. Карнегинин айтуусу боюнча, коммуникабелдүүлүк ага адам катары калыптануусуна, турмуштан өз ордун табууга жардам берген. Анткени ал карым-катнаш жасай билүүнүн ыкмаларына ээ болуу менен өз күчүнө карата ишенбөөчүлүктү жеңе алган. Адамдар менен байланыш жасоонун ыкмаларына, өз көз карашына тура билүү менен аларга жетекчилик кыла алууга жетишкен.

Дейл Карнеги жазган китептер анын мекенинде гана эмес, дүйнө жүзүндө популярдуу. Айрым психологдордун пикири боюнча, "Карнегинин жолу" менен өз турмуш жолдорун кура билген адамдар азыркы учурда Лев Толстойду же Жан-Жак Руссону туураганга аракет кылгандарга караганда бир кыйла көп кездешет. Себеби коммуникативдик маданият адамдарга эл алдында сүйлөгөндө толкундануудан арылууга, өзүнүн оюнун тууралыгын далилдей алуу менен кайсы гана чөйрөдө болбосун ишенимдүү, эркин, өз алдынча далилдүү сүйлөй билүүгө жардам берет.

Д.Карнеги 1955-жылы 1-ноябрда 67 жаш курагында көз жумган.