Ат-Башыда аң уулоого чыгып, унаалары карга тыгылган 18 адамды куткарууга 16 адам жөнөтүлдү

2016-жылдын 17-ноябрь күнү Ат-Башы районундагы Ак-Сай өрөөнүнө 2 топ өз-өзүнчө аң уулоо максатында чыгып кеткен. Биринчи топто 3 чет өлкөлүк, 10 Кыргыз өлкөсүнүн жараны жана экинчи топто 1 чет өлкөлүк, 4 Кыргыз өлкөсүнүн жараны болгон. Чыгып кеткен жарандар 23-ноябрь күнү 2 Газ-66 унаасы менен Ат-Башы-Кында-Ак-Сай унаа жолу аркылуу Ат-Башыны көздөй жол тартышкан. 23-ноябрда саат 12:30 чамасында Ак-Сай өрөөнүндөгү “Чатыр-Таш” тозотунан Ат-Башы-Кында-Ак-Сай унаа жолу жабык дегендерине карабай өтүп кетишкен. Кардын калыңдыгынан унаалары жүрө албай, 1-топ Босого тилкесинде жана 2-топ Беш-Белчир тилкесинде кар күрткүсүнө тыгылып калган. Бул тууралуу Өзгөчө кырдаалдар министрлигинин басма сөз кызматы бүгүн, 24-ноябрда кабарлады.

"Жарандарга жардам берүү боюнча ӨКМнын Ат-Башы райондук №45-өрт-куткаруу кызматынын куткаруучуларын Баш-Кайыңды айылынын тургунунун Урал унаасы менен жиберүү жагы уюштурулуп, №45-өрткө каршы бөлүмүнөн 6 куткаруучу, райондук ӨКМнын 2 кызматкери, райондук ооруканадан 1 фельдшер, туугандарынан 2 адам, Урал унаасынын айдоочусу, Ак-Муз айылынан 4 жол көрсөтүүчү адам - жалпы 16 адам Ат-Башы айылынан 2016-жылдын 24-ноябрь күнү саат 01:36да куткаруу иш-чараларын жүргүзүү үчүн чыгып кетти", - деп айтылат маалыматта.

Ат-Башы-Кында унаа жолу кыш мезгилинде кар калың жаап, кар күрткүлөрү көп болгондуктан, жыл сайын жабылат. Акимдин буйругунун негизинде Ат-Башы-Кында унаа жолу 2016-жылдын 17-ноябрынан 2017-жылдын 15-майына чейин жабылган.