Депутат: "Ноокаттагы мектептин директору "чоңдор келмейинче спортзалды балдар үчүн ачпайм" дейт"

Жогорку Кеңештин 24-ноябрдагы жыйынында депутат Зиядин Жамалдинов Ноокат районунун Нарай айылындагы орто мектептин спорттук залы салтанаттуу ачылыш аземи өткөрүлмөйүнчө ачылбай турганына нааразычылыгын билдирди.

"Бул мектептин курулушу 2007-жылы башталып, эптеп бүтүрүлгөн. Арадан 3 жыл өтүп, спортзал толук бүткөн, бирок дене тарбия сабагын бул спортзалда өткөрүүгө уруксат берилбей жатат. Мектептин директору "премьер-министр келип салтанаттуу ачылыш аземине катышмайынча
спортзал ачылбайт" дептир. Учурда дене тарбия сабагы сыртта өтүүдө. Спортзалды салтанаттуу ачуу - бул уят", - деди Жамалдинов.

Андан соң ал өкмөттүн парламенттеги өкүлүнө кайрылып, бул маселени тез арада чечүүнү талап кылды.