Жыл сайын өлкөдө 600дөй бала ар кандай патологиялар менен төрөлөт

Жыл сайын өлкөдө 600дөй бала ар кандай патологиялар менен төрөлөт. Бул тууралуу Кыргыз Республикасынын Эмгек жана социалдык өнүгүү министри Таалайкүл Исакунова Ден соолугунун мүмкүнчүлүгү чектелген балдардын ата-энелеринин ассоциациясы менен жолукканда айтты.

"Министр Ден соолугунун мүмкүнчүлүгү чектелген балдардын ата-энелеринин ассоциациясынын ишмердүүлүгү менен "Жакшылык жана боорукердик үчүн" иш-чарасынын алкагында таанышты. Ассоциациянын өкүлдөрү алардын ишмердүүлүгү биринчи кезекте мүмкүнчүлүгү чектелген балдардын ата-энелерине колдоо берип жана балдарын реабилитациялоо боюнча кеңеш берүүдө экенин билдиришти", - деп жазылат маалыматта.

"Биз ден соолугунун мүмкүнчүлүгү чектелген адамдардын укугун коргойбуз. Семинар жана тренингдерди өткөрүп келебиз", - деген юрист Зейнеп Дыйканбаева.

Патологиялар менен төрөлгөн балдардын көпчүлүгү жардамга муктаж. Мындан улам билим берүү, медициналык, социалдык тейлөөлөрдү көрсөтүүчү борборлор керектиги белгиленди.