"Алымбек датка" тасмасынын сценарийине 1 миллион сом кетип, бирок тасма тартыла электигине депутат нааразы

"Алымбек датка" толук метраждуу тасмасынын сценарийин жазууга 1 миллион сом жумшалды. Бул тууралуу бүгүн, 28-ноябрда Жогорку Кеңештин Бюджет жана финансы боюнча комитетинин отурумунда Маданият, маалымат жана туризм министрлигинин статс-катчысы Бактыбек Секимов билдирди.

Анын айтымында, сценарий Асан уулу Алымбек датканын 215 жылдыгына карата Кыргыз Республикасынын Өкмөтү пландаган иш-чараларды ишке ашыруу максатында даярдалган. "Тасманын тартылбай калганынын себеби - бул максатка каражат бөлүнгөн эмес. Мындан улам Алымбек датканын 220 жылдыгына карата тасманы тартып бүтүрүүнү пландап жатабыз", - деди чиновник.

Буга депутат Улан Примов нааразычылыгын билдирди. Анын айтымында, датканын 220 жылдыгына карата сөзсүз түрдө тасма тартылып, мындан тышкары чоң масштабдуу иш-чара өткөрүлүшү керек.

Эскерте кетсек, аталган тасманын сценарийин жазуу боюнча сынак үстүбүздөгү жылдын 30-июлунда жыйынтыкталган. Анын жыйынтыгы боюнча эксперттик кеңештин кароосуна бир сценарий түшкөн. Сценарийдин авторлору Баян Сарыгулов, Бекен Назаралиев жана Бакыт Карагулов экени белгилүү болгон.