"Айылдарда ата-энелер айына 4 миң сом төлөй албагандыктан, балдарын жеке бала бакчага киргизишпейт" дейт депутат

Айылдарда ата-энелер балдарын жеке бала бакчаларга киргизе алышпайт, анткени айына 3-4 миң сом төлөө керек. Мындай пикирин бүгүн, 28-ноябрда Жогорку Кеңештин Бюджет жана финансы боюнча комитетинин отурумунда депутат Айбек Алтынбеков билдирди.

Анын айтымында, аймактарда ата-энелер баланын тамак-ашына 1 миң сом төлөй алышат. "Жеке бала бакчада отунга, электр энергияга, тарбиялоочулардын айлыгына каражат керек. Борбор калаада ата-энелер бул чыгашаларды төлөп бере алышса, айылдарда мындай эмес. Мамлекет буга көңүл буруп, колдоо көрсөтүшү керек", - деди депутат.

Мындан тышкары ал билим берүү министри аймактардагы мектептерге барып, абалы менен таанышып чыгуусу зарыл экенин баса белгиледи. Өкмөттүн өкүлү 2017-жылдын 1-январынан тарта билим берүү министри орун басарлары менен аймактарга чыгууну пландаганын билдирди.

"Жеке бала бакчалар салыктан бошотулгандан бери 200дөй жаңы жеке бала бакча ачылган. Мамлекет тарабынан жеңилдиктер каралып жатат. Бул маселе өкмөттүн көзөмөлүндө", - деп жооп берди чиновник.