Бишкек шаарынын Токтогул-Абдрахманов көчөлөрүнүн кесилишинде 1000 чарчы метр аянтка сквер курулат

Бишкек шаарынын Токтогул-Абдрахманов көчөлөрүнүн кесилишинде 1000 чарчы метр аянтка сквер курулат. Бул тууралуу бүгүн, 28-ноябрда SUPER.KG порталына Бишкек шаардык "Жашылдандыруу" ишканасынын адиси Токтобек Абдыкеримов билдирди.

"Шаардын көркүн арттыруу максатында иш-аракеттерди көрүп жатабыз. Советтер Союзу учурунда 1982-жылы курулган фонтан кайрадан оңдоп-түзөөдөн өткөрүлөт. Айланасы түнкүсүн заманбап чырактар менен жарыктандырылат. Эс алуучулар үчүн отургучтар коюлуп, шарттар түзүлөт. Бүгүнкү күндө сквердин айланасында ондон ашуун дарактар тамыры менен алынып жатат", - деп билдирди Абдыкеримов.

Учурда дарактардан, эски асфальттын үстүнкү кабатынан арылуу иштери башталып, жаз алды менен толук кандуу жумуш башталарын кошумчалады адис. Жашоочулар үчүн эс алуучу жай 2017-жылдан тарта иштеп баштамакчы.

Токтобек Абдыкеримовдун маалыматына ылайык, 2017-жылы Чүй-Ибраимов көчөлөрүнүн кесилишине, Туңгуч кичи районуна да скверлер курулат.