Дастан Бекешев депутаттардын Ак үйдө каалаган жерде тамеки чеккенине нааразы болуп, "спикерге айтам" деди

"Ак үйгө келгендер жана депутаттар каалаган жерде тамеки чегишет, дааратканага кирсең тамеки жыттанып чыгасың", - деп бүгүн, 29-ноябрда Жогорку Кеңештин Экономикалык жана фискалдык саясат боюнча комитетинин жыйынында депутат Дастан Бекешев нааразычылыгын билдирди. Анын айтымында, ал бул маселе менен спикерге сөзсүз түрдө кайрылат.

Отурумда тамекинин зыяндуу таасиринен жарандардын ден соолугун коргоого, кальян тартуу аркылуу пайдаланылган тамекиси жок аралашмаларды колдонууну кыскартууга багытталган мыйзам долбоору 1-окууда каралууда.

"Бүгүнкү күндө бир куту тамекини дүкөндөн 25 сомго сатып алса болот. Эң төмөнкү бааны 40-50 сом кылуу керек. Ошондо өспүрүмдөргө тамеки сатып алуу кыйыныраак болот жана бюджетке көбүрөөк киреше түшөт. Мындан тышкары коомдук тамактануучу жайларда тамеки чегүүгө атайын жайларды бөлүү зарыл. Учурда тиешелүү мыйзам бар, бирок ал чийки жазылгандыктан, кафелердин ээлери аны сактабай жатышат", - деди депутат.

Талкууда депутат Экмат Байпакбаев тамеки чегүүгө атайын жайды бөлүүнү Ак үйдөн баштоону сунуштады. Депутат Бекешев аны менен макул болуп, депутаттар тамекини каалаган жерде чегүүнү токтотууну өздөрүнөн башташы керектигин айтты.