Дайыр Исмадияров: "Супер концерт Анжелика экөөбүзгө дуэт ырдоо мүмкүнчүлүгүн түздү"

Ушул жылдын 9-декабрында Бишкектеги Спорт Ордосунда SUPER.KG порталынын 10 жылдыгына карата өткөрүлө турган супер концертке учурда кызуу даярдыктар жүрүп жатат. Ага ырчылар атайын дуэт чыгармаларды жаздырышууда. Алсак, белгилүү ырчылар Анжелика менен Дайыр Исмадияров "Кызыл гүлүм, ай" ырын бирге аткарышат.

"Негизи, Анжелика экөөбүз өз репертуарыбыздагы ырлардан попурри аткаралы дегенбиз. Анан кеңешип, "Кызыл гүлүм, ай" аттуу чыгарманы аткарууну чечтик. Алгачкы жолу Анжелика менен дуэт жаздырууга мүмкүнчүлүк берген сиздерге рахмат, чыгарма өзүбүзгө да жакты. Буюрса, концертке даярдыктар жакшы. Жаңы жылдан кийин бул ырга клип тартууну пландап жатабыз, идеясы даяр болуп калды", - деп билдирди Дайыр Исмадияров.

Белгилей кетсек, 9-декабрда өтө турган концерт "Супер сулуу-2016" сынагы менен коштолот. Анда кыргыздын белгилүү эстрада жылдыздары Гүлнур Сатылганова, Айчүрөк Иманалиева, Каныкей, "Биз" тобу, Жийдеш Идирисова, Нурлан Насип, Урмат Усенов, Неля жана башкалар катышат. Концертте "Биз" тобу менен Аваз Акимов "Муйдусунан", Ильяз Андаш менен Курал Чокоевдин аткаруусунда "Сейдакматтын ыры" аттуу мегахиттер жаңырып, Баястан, Бегиш хит болгон рэп чыгармаларын тартуулашат.