Жогорку Кеңештин депутаттарынан шайлоо комиссияларынын кызматкерлеринин эмгек акыларын көтөрүүнү суранышты

Жергиликтүү шайлоо комиссияларынын кызматкерлерине жүктөлгөн жумуш оор болгондуктан, алардын эмгек акыларын көтөрүү керек. Мындай сураныч менен бүгүн, 12-декабрда маалымат жыйынында Борбордук шайлоо комиссиясынын төрайымы Нуржан Шайлдабекова Жогорку Кеңештин депутаттарына кайрылды.

Анын айтымында, кечээ, 11-декабрда жергиликтүү кеңешке шайлоо жана референдум таза, ачык-айкын, демократиялык принциптердин негизинде өттү. "Шайлоо комиссиялары бул максатка жетиш үчүн чоң жумуш жасашты. Аларга жүктөлгөн милдеттер көп. Биометрика киргизилгендиктен, шайлоо комиссияларынын кызматкерлери шайлоонун жыйынтыгына эч кандай таасир эте алышпайт", - деди Шайлдабекова.

Айта кетсек, жергиликтүү кеңешке шайлоодо жана референдумда иштеген ар бир оператор колуна 6200 сом алат. Мамлекеттик каттоо кызматынын төрагасы Тайырбек Сарпашевдин айтымында, республика боюнча 9 миңге жакын оператор бар. "Келишимге ылайык, ар бир операторго 8000 сом берилери айтылган, бирок салык кармалып, ар бир операторго колуна 6200 сомдон берилмекчи", - деген Сарпашев.

Буга чейин аймактарда иштеген операторлор SUPER.KG'ге кайрылып, аларга шайлоодо иштегени үчүн 8000 сом төлөнөрүн айтышып, бирок 6200 эле сом берилерине нааразычылыгын билдиришкен.