Супер-Инфо
super.kg видео
"Супер сулуу-2016" сынагынан фоторепортаж
9-декабрда Бишкектеги Спорт Ордосунда жылдын "Супер концерти" болуп өттү. Концерт көптөгөн кызыктар, мегахиттер, дуэттер жана сулуулар сынагы менен коштолду. Сынактын шартына ылайык, кыргыздын кымча бел сулуулары 4 тапшырма боюнча өз өнөрлөрүн көрсөтүштү. Сулуулардын талантына "Beeline" компаниясынын каржы боюнча директору Тилек Акматов, Жогорку Кеңештин депутаты Аида Исмаилова, шоумен, ди-джей Алтын Камчиев, "Сайма телеком" компаниясынын каржылык директору Дамира Кебекова, "Азия банкы" жабык акционердик коомунун башкармалыгынын төрагасы Нурлан Алдаяров, "Эйр Манас" авиакомпаниясынын өкүлү Усен уулу Аскар, стилист, дизайнер Замира Молдошева, ММКларды колдоо борборунун өкүлү Бакыт Дыйканов, “Супер сулуу-2009” сынагынын жеңүүчүсү Жамиля Ишенбай кызы, "Тумар" радиосунун жана телеканалынын директору Алексей Сидоров, "Азаттык" үналгысынын жетекчиси Султан Каназаров, "Нуртелеком" компаниясынын өкүлү Улугбек Ахмедов баа берип жатты.
Алгач катышуучулар тааныштыруу тапшырмасында өздөрү, хоббиси, жашоодогу максаты тууралуу кыскача айтып, сынакка катышып жаткандыгынын себептерин түшүндүрө кетишти. Андан соң "Jeans style" көрсөтмөсү болуп, кыздар подиумдан өтүштү.
Сынактын кульминациялык учуру чыгыш бийин бийлөө болду. Алгач 16 сулуу топ менен бийлеп, андан соң ар бир катышуучу урма аспаптын коштоосунда соло бийледи. Кыздардын бийин залдагы эл суратпай кол чабуу менен коштоп турду.
Эң соңунда кече көйнөктөрү көрсөтүлдү. Катышуучулардын SUPER.KG порталына жайгаштырылган видеолорунун арасынан көп каралып, жылуу пикирлерге ээ болгон Аида Карабаевага редакциялык чечимдин негизинде "SUPER.KG ажары" наамы тапшырылды. Андан соң калыстар тобунун добушу менен "Сымбаттуу сулуу" наамы Алтынай Эмилбековага, "Ажарлуу сулуу" наамы Айзада Абанбековага ыйгарылды. Ал эми "Супер сулуу-2016" наамы менен катар Бали аралына жолдомону Бактыгүл Орозбаева утуп алды. Ага таажыны "Супер сулуу-2013" наамынын ээси Орункүл Шабралиева кийгизип, "Супер-Инфо" гезитинин директору Шайиста Шатманова Бали аралына жолдомону тапшырды.
Алишер Алиев
0
1 |