МЕДИА-ПОРТАЛ: "Алга, Кыргызстан!" клибинде ат чаап бараткандар биз эмеспиз, жигиттер болчу" дейт Айчүрөк Иманалиева

"Медиа-портал" бөлүмүндөгү патриоттук клиптердин бири - кыргыздын белгилүү ырчылары Айчүрөк Иманалиева, Асел Турдалиева, Алина Жетигенова ырдаган "Алга, Кыргызстан!" ырынын клиби. Чыгарма тууралуу колдонуучулар да көп талкуулап, көпчүлүгү жылуу пикирлерин билдиришкен. Трио болуп ырдоону Асел Турдалиева сунуштаса, ырдын обонун Айчүрөк Иманалиева жазган.

"Клиптин идеясы үчөөбүзгө тең таандык. Кандай форма киерибизди, сюжети кандай болорун чогуу түзгөнбүз. Алина бир аз бизге эркелеп, жалкоолонуп жатканына карабай жакшы тартып бүтүрдүк. Улам Асел экөөбүз эле режиссёрго барабыз, "Эмне болду, бүттүбү?" деп. Соңунда Эрнист Сыдыков да "Алина эже барбы, клип бүткөндөн кийин үйүмө таштап кеткиле деп айта элекпи?" деп күлүп жатты", - дейт Иманалиева.

"Эң негизгиси, чыгармабыз элге жакса болду" деген ырчы ат чаба албагандыктан, айылдык жигиттерге көйнөк кийгизип, жоолук салып ат чаптыртканын айтат.

"Алина экөөбүз тең ат мине албайт экенбиз. Анан айылдагы жигиттерди чакырып, үчөөбүздүн көйнөгүбүз кайсы жигитке туура келсе, ошого кийгизип, бетин боёп койгонбуз. Клипте биз эмес, жигиттер ат чабышкан. Ошентип, жигиттердин бизге чоң жардамы тийген", - деп сөзүн жыйынтыктады ырчы.

Асел Турдалиева, Айчүрөк Иманалиева, Алина Жетигенованын "Алга, Кыргызстан!" ырынын клибин бул жерден көрүңүз.