Таш-Көмүрдөгү шахтада уранды алдында 11 саат жатып аман калган жаран: "Бир аз боштук бар эле, ошо менен дем алып жаттым"

2016-жылдын 16-декабрь күнү саат 12:00 чамасында Жалал-Абад облусунун Таш-Көмүр шаарындагы көмүр шахталарынын биринде жер кыртышы урап, 4 адамды басып калган. Кырсыктын кесепетинен Таш-Көмүр шаарынын тургуну, 1978-жылы туулган Ч.Б. жана Аксы районунун тургуну У.Н. каза тапкан.

Өзгөчө кырдаалдар министрлигинин маалыматына караганда, жалпы 27 куткаруучу издөө иштерин жүргүзгөн. Натыйжада Дамир Канатбеков 2 сааттан кийин, ал эми Дайырбек Байышкулов 11 сааттан кийин куткарылып, Таш-Көмүр шаардык ооруканасына жеткирилген.

“Учурда Дайырбек Байышкуловдун абалы баштагыга караганда жакшы. Өз алдынча басып калды. Ал эми Дамир Канатбековдун буту сынган. Ага пландуу түрдө операция жасалат, даярдыктар көрүлүүдө”, - деп билдиришти Таш-Көмүр шаардык ооруканасынан.

11 саат уранды алдында жаткан Дайырбек Байышкулов SUPER.KG порталына буларды айтып берди: “Жалпы төртөөбүз көмүр казып жатканбыз. Күтүлбөгөн жерден жер кыртышы урап, бизди басып калды. Жанымда чоң таш болуп калып, уранды толук көмгөн жок. Бир аз боштук бар эле. Ошо менен дем алып жаттым. Дем жетпей, бир канча жолу эс-учумду жоготтум. Кийин адамдардын үнүн угуп, кыйкырууга аракет кылдым. Бирок ага үнүм деле чыкпай калыптыр. Куткаруучуларга рахмат, өмүрүмдү сактап калышты”.