ЖЫЛНААМА, 27-ДЕКАБРЬ: Белгилүү франциялык актёр Жерар Депардье 68 жашка толду

Белгилүү франциялык актёр Жерар Депардье 68 жашка толду. Ал 1948-жылы 27-декабрда Франциянын Шатору шаарында жарык дүйнөгө келген. "Алтын глобус" сыйлыгынын лауреаты, "Сезар" сыйлыгынын эки жолку ээси Жерар Депардье Францияда гана эмес, бүт дүйнө жүзүнө таанымал таланттуу актёр. Жерар Депардье комедияларда гана эмес, мелодрама, тарыхый тасмаларда да роль жараткан. Ал Жан-Поль Бельмондо, Ален Делон сыяктуу белгилүү актёрлор менен катар СССРдин аймагында атактуулукка жеткен. Аны көпчүлүк Пьер Ришар менен чогуу тартылган "Аталар", "Качкындар", Кристиан Клавье менен биргеликте тартылган Астерик менен Обеликс жөнүндөгү комедиялары аркылуу таанышат.

1970-жылы Ж.Депардье актриса Элизабет Гиньё менен баш кошуп, 1 уул жана 1 кыздуу болушкан. 26 жыл чогуу жашаган соң, 1996-жылы ажырашып кетишкен. Уулу Гийом жана кызы Жули ата-энесинин жолун жолдоп актёрлук кесипти тандап алышкан. 2008-жылы Гийом оорудан улам 38 жашында каза болгон.

Түрдүү жанрдагы "Менин атам - баатыр", "Жолу болбогондор", "Периште менен шайтандын ортосунда", "Дантон", "Сирано де Бержерак", "Наполеон", "Распутин", "Пинин жашоосу" жана "Кыялдар лигасы" - актёр катышкан бегилүү тасмалар. Ж.Депардье актёрлуктан тышкары бир нече ресторандын ээси жана шарап даярдоо бизнеси менен алектенет.

2013-жылдын 5-январында актёр Орусиянын жарандыгын алып, Бельгиянын ардактуу жараны аталган. Ж.Депардье быйыл режиссёр Фанни Ардандын "Сталиндин диваны" аттуу тасмасында Иосиф Сталиндин образын жараткан.

27-декабрга карата жылнаама.