КИНОЗАЛ. Эксклюзив! "Напарниктер" тасмасы жооптуу кызматкерлерди ишин так аткарууга чакырат" дейт Бакыт Осмонканов

Бүгүн, 1-январда "Кинозал" бөлүмүнө "Напарниктер" тасмасы жүктөлдү. Интернет айдыңында биздин гана порталдан аталган тасманы көрө аласыздар. Башкы ролдордо - Жеңиш Майрамбек уулу менен Азим Кунеев.

2015-жылдагы көрүүлөр боюнча прокатка коюлган тасмалардын арасынан 2-орунда турган "Напарниктер" тасмасы укук коргоо органдарынын кызматкерлери тууралуу. Анда райондук эки милиция кызматкеринин кызыктуу, күлкүлүү окуялары чагылдырылат. 7 жылдан бери аймактык тескөөчү болуп иштеген Белекке шаардан Арстан аттуу кызматкер келип кошулат. Тасмада укук коргоо органдарынын ичиндеги көйгөйлөр, саткындык жана кыргыз үй-бүлөсүндөгү түрдүү маселелер көрсөтүлөт.

Тасманын режиссёру Бакыт Осмонкановдун айтымында, ар бир тасманын көрүүчүлөрдү жакшылыкка үйрөтүүчү жана үндөөчү идеясы, моралдык жактан оң мааниси болушу керек. Бул тасмада да режиссёр тамаша аркылуу кээ бир адамдардын аң-сезимин ойготкусу келген.

"Менин оюмча, укук коргоо органдарында, жоопкерчиликтүү кызматтарда иштегендер чын дилинен иштесе, кыргыз элинин жашоосу оңолот. Албетте, жашоо оор, бирок ага карабастан мындай жооптуу жерде иштегендер өзүнүн жумушун так аткарышса жакшы болмок. Тасманы көргөндөр туура иштөөгө мотивация алат деген ишенимдемин", - дейт Осмонканов.

Ар бир тасманы тартууда кыйынчылыктар болот эмеспи. "Напарниктер" тасмасы да өзгөчө кыйынчылыктар менен тартылганын кошумчалады режиссёр.

"Тасманы көп жерлерден тартканбыз, массовкага катышкандар да көп болгон, трюктар да көп жасалган. Кээде 2 секундалык кадрды бир күн кечке тартчубуз же 1 мүнөттүк жерине 1 жума кетчү, андыктан оорчулуктар болду. Балким, менин кино тартууда тажрыйбамдын аздыгы буга себеп болдубу... Бирок тасма жарым жылдык прокатта өзүн актады", - деди Бакыт Осмонканов.

"Напарники" тасмасын бул жерден көрө аласыз.