МЕДИА-ПОРТАЛ: "Жаңы жыл" клибин тартуу учурунда лыжа тебе албай жүдөп, жаракат алдык" дейт ырчы Арсен

Жаңы жылга карата кыргыз элине майрамдык маанай тартуулоо максатында белгилүү ырчы Арсен "Жаңы жыл" ырына клипти Каракол жергесинен тартып келген. Ырчы ал жакка клип тартуу үчүн алгачкы жолу достору менен барып, бирок көпчүлүгү лыжаны жакшы тебе албагандыктан кыйналышканын, жадакалса жаракат алышканын айтат.

"Каракол кооз дегенинен ал жакка барып, эс алуу менен бирге клип тартып келдик. Баары жомоктогудай, ийгиликтүү болуп жатты, бирок клипти тартуу учурунда кыйналдык. Себеби досторумдун бирөөсү да лыжа тепкенди жакшы билбейт экен. Улам жыгылып, кайра туруп, күлүп, кыскасы, аябай жүдөдүк. Буттарыбыз суу болуп, жаракат да алдык.

Экинчи күнү мен ырдаган жана сноуборд тепкен кадрлар тартылмак. Мен да ойлонбой 3400 метр бийиктикке чыгып кетиптирмин. Ал эми сноубордду да экинчи ирет тебишим эле. Образга кирип кетип, тээп баратып катуу кулап түштүм. Жердин кооздугунан, абанын тазалыгынан ооруган жерлерибизди да унутуп, эс алып, иштеп келдик", - дейт Арсен.

Ошондой эле ырчы "Жаңы жыл" ырынын клиби анын экинчи режиссёрлук эмгеги экенин, алгачкы жолу өзүн режиссёр катары "Болчу мени менен" клибинде сынап көргөнүн кошумчалады.

Арсендин "Жаңы жыл" ырынын клибин бул жерден көрүңүз.