Тышкы иштер министрлиги Йахье Машрапов боюнча билдирүү таратты

Кыргыз Республикасынын Тышкы иштер министрлиги Стамбулдагы кол салууга шектүү деп паспортунун сүрөтү жарыяланган Йахье Машрапов боюнча билдирүү таратты. Анда Түркиянын Машрапов боюнча эч кандай расмий билдирүү жөнөтпөгөнү жана "анын терактка катыштыгы бар" деген маалымат такталбаганы айтылат.

"Кыргыз Республикасынын укук коргоо органдары бул маселе боюнча иштеп жатышат. Учурда Машраповдун 1-январда Стамбулга барып, кайра 3-январда Бишкекке келгени аныкталды. Түрк полициясы аны Стамбулдагы аэропортто суракка алып, кайра коё берген", - деп айтылат билдирүүдө.

Айта кетсек, 31-декабрдан 1-январга караган түнү Стамбулдагы "Рейна" түнкү клубуна куралдуу кол салуу болуп, 39 адам каза тапкан. Ал эми 70ке жакын адам ар кандай жаракат алган. Каза болгондордун арасында Орусиянын, Бельгиянын, Франциянын, Индиянын, Ирактын, Сауд Арабиянын жарандары да бар. Ал эми "Ислам мамлекети" террордук тобу "терактты биз уюштурдук" деп жарыялады.