Бишкектин унаа жолдору тосмолор менен бөлүнүүдө

"Бишкек асфальт-сервис" муниципалдык ишканасы Дэн Сяопин кең көчөсүнө Интергельпо көчөсүнөн Алыкулов көчөсүнө чейин темир тосмолорду орнотууда. Бул тууралуу Бишкек шаардык мэриясынын басма сөз кызматы билдирди.

Маалыматка ылайык, тосмолор жүргүнчүлөр тыюу салынган жерден өтүп, кооптуу кырдаал жаратпашы үчүн, айдоочулардын жана жөө жүрүүчүлөрдүн коопсуздугу, жол кырсыктарын алдын алуу үчүн орнотулуп жатат. Бийиктиги 1,5 метр болгон тосмолор 3,5 чакырымга чейин орнотулат.

Андан сырткары ишкананын кызматкерлери "Кудайберген" базарынын жол тилкесине да бетон тосмолорун (парапет) орнотушары жазылат маалыматта.

"Урматтуу шаардыктар! Бишкек мэриясы ар бириңерден жолдо абайлап жүрүүнү суранат. Ошондой эле муниципалдык менчикке аяр мамиле кылууга, жол белгилерин жана көрсөтмөлөрдү талкалабоого чакырат", - деп жазылат маалыматта.