Апрель окуясы боюнча айыпталган мурунку башкы прокурор Нурлан Турсункулов эркиндикке чыкты

2010-жылдагы Апрель окуясы боюнча айыпталган мурунку башкы прокурор Нурлан Турсункулов мөөнөтүнөн мурда шарттуу түрдө бошотулду. Тиешелүү чечимди Чүй облусунун Аламүдүн райондук соту чыгарган. Чечим чыгарууда Турсункуловдун абакта мөөнөтүнүн үчтөн экисин өтөп бүткөнү эске алынган.

Буга чейин 2010-жылы Бакиевдин кеңешчиси болуп турган Эльмурза Сатыбалдиев, президенттик аппараттын мурунку башчысы Каныбек Жороев да мөөнөтүнүн үчтөн экисин өтөп бүткөнүнө байланыштуу абактан мөөнөтүнөн мурда шарттуу бошотулушкан.

Эскерте кетсек, 2010-жылдагы Апрель окуясы боюнча айыпталган мурунку башкы прокурор Нурлан Турсункулов, "Альфа" атайын даярдыктагы аскер бөлүгүнүн мурунку командири Алмаз Жолдошалиев, ошол кездеги президенттин кеңешчиси Эльмурза Сатыбалдиев жана президенттик аппараттын мурунку башчысы Каныбек Жороев "кызмат абалынан кыянаттык менен пайдалануу" беренеси боюнча 2014-жылы 10 жылга соттолушкан.